Алматыда электротехникалық жабдықтар шығаратын зауыт ашылды
2023 жылғы 23 қарашада «Инновациялық технологиялар паркі» арнайы экономикалық аймағында электротехникалық жабдықтар мен электр энергиясын тарату жүйелерін шығаратын қазақстан-малайзия зауытының ашылуы өтті.
Инвестициялық жобаны 1976 жылдан бастап мұнай — газ және электротехникалық өнімдер нарығында белсенді ойыншы болып табылатын малайзиялық компанияның Орталық Азиялық өкілдігі-OSB Kazakhstan жүзеге асырады. Өндіріс процесінде «RAWAK SMART» төмен вольтты жүйесінің инновациялық технологиясы қолданылатын болады.
Жобаны іске асыруға ауданы 0,6 га жер учаскесі бөлінді, жобаның құны 15 жұмыс орнын құрумен 980 млн. теңгені құрайды. Өндірістік қуаттылықтар жылына 2 мыңға жуық өнім шығаруға есептелген.
Ашылу салтанатына Almaty Business Development Company басқарма төрағасы А. Рамазан қатысып, Қазақстан-Малайзия қатынастарының дамуына қолдау көрсетуге дайын екендігін білдірді.
